Isa 54 | ZomZIV | STEP | “Tasel numei, ta a nei ngei lo nu aw, la sa in; nau suah nat a thuak ngei lo nu aw, la sakhia-in lungdamin awng in. Bang hang hiam cih leh pasal nei numei’ tate sangin a kinusia numei tate a tamzaw hi,” TOPA in a ci hi.

Isaiah 54

Mailama Zion Minthan Nading

1 “Tasel numei,
ta a nei ngei lo nu aw, la sa in;
nau suah nat a thuak ngei lo nu aw,
la sakhia-in lungdamin awng in. ^a
Bang hang hiam cih leh pasal nei numei’ tate sangin
a kinusia numei tate a tamzaw hi,” ^b

TOPA in a ci hi.
2 “Na puanbuk mun khan in,
na puanbuk zapi in zal inla
khiam kik nawn kei in;
na khaute sausak inla,
na khetphimte kipsak in.
3 Ahang in, veilam le taklam ah na kiphalh dinga;
nangma suante in minamte suankhia in,
a kilawi khuapite ah a teng ding uh hi. ^c
4 “Kihta kei un; na maizum kei ding uh hi. ^d
Na zahlak khak ding uh lau kei un; hong kimaizumsak lo ding hi.
Na khangmoi lai-a na maizumna na mangngilh dinga, ^e
na meigon lai-a mawhsaknate na phawk kha nawn kei ding hi. ^f
5 Ahang in, nang hong Bawlpa na pasal hi a - ^g
ama min Thahatpen TOPA ahi hi -
Israel-te Siangtho Pa nang hong Tanpa hi a; ^h
amah leitung khempeuh’ Pasian kici hi. ⁱ
6 A kimasa zi,
a lungsim a dong ngeungau bang - ^j
a kima lel dinga khangmoi lai pi-a kitenpih zi bangin,
TOPA in nang hong sam kik ding hi,” na Pasian in ci hi.
7 “Tomkha sung nang kong nusia a, ^k
ahi hangin hong khuatuah lua-in kong la kik ding hi.
8 Heh lua-in ^l
tomno sung kong lehngatsan a, ^m
ahi hangin tawntung migitna-in
nang kong khuatuah ding hi,” ⁿ
nang hong Tanpa TOPA in ci hi.
9 “Hih in kei adingin, Noah tuite in leitung a tuam nawn kei ding hi,
ci a ka kiciam Noah hun lai a bang ding hi.
Tua bangin tu-in nang tungah a heh lo dingin ka kiciam khina, ^o
nang kong tai kik nawn kei ding hi.
10 Mualliante kilokin
mualneute kikhin taleh, ^p
nang kong itna kip kiling lo dinga,
ka lemna thukhun zong a kikhin kei ding hi,” ^q
nang hong khuatuah TOPA in ci hi. ^r
11 “Huihpite in nawkgawpa a kihehnem lo khuapi aw, ^s
turquoise ^{▼▼54.11 Hih kammal Hebrew in a khiatna kician lo hi.} suangin kong lam dinga ^u
na bulpi sapphire ^{▼▼54.11 Ahikeh lapis lazuli} in ka lam ding hi. ^w
12 Na kulh dawnvang Ruby ka hisak dinga
na kongpite a tee daldal Jewel hisakin na kulh khempeuh
suang manpha ka hisak ding hi.
13 Na tapate khempeuh TOPA in hilh dinga, ^x
na tate lungnopna lian mahmah ding hi. ^y
14 Thumaanna-in nang hong kikipsak dinga, ^z
ukcipna tawh na kigamla ding hi;
bangmah na kihta kei ding hi. ^aa
Gamlapi ah launa kikhinkhia dinga,
nang kiang hong tung kei ding hi.
15 Khatpeuh in nang hong sim leh, kei sep ahi kei ding hi;
nang hong sim peuhpeuh nang tungah hong kipumpiak ding uh hi.
16 “En in, meihol zaapkuang a,
a kizat nading muna hiam a suah sikseekpa ^ab
keima piansak ahi hi.
A siasak dingin a susiapa a piangsak keimah ka hi hi; ^ac
17 Nang do nadingin hiam a seek peuhmah mavang lo dinga, ^ad
nang hong mawhsak leii peuhmah na zothal ding hi.
Hih in TOPA nasemte luah hi dinga,
hih in kei pana amau luah thumaanna hi ding hi,” ^ae

TOPA in cikhia hi.